நாயி (சிறுகதை)
இது ஒரு நாயப்பத்தின கத. அந்த நாயிக்கி பேரு இருந்தாலும் நாம நாயின்னே கூப்டுவோம். நாயின்னு கூப்ட தகுதியானதுதான் அந்த நாயி. இன்னும் சொல்லப்போனா நாயின்னு மட்டுந்தான் கூப்டணும் அந்த நாய.
காலேஜுக்கு முன்னால எல்லா இளைஞர்களும் குழந்தை-பதின் பருவர்களாக பள்ளிகளுக்கு போவாங்க. அப்பிடி மத்தவங்க ஆறாம் வகுப்போ ஏழாம் வகுப்போ படிச்சிட்டிருந்தப்ப நாங்க ஆறாம் வகுப்பு வகுப்புல போயி உக்காந்துட்டு உக்காந்துட்டு வருவோம்.
நாங்கன்னா நானும் ஒரு நாயின்னு சொன்னேனே அந்த நாயும்.
மொத்தம் மூணு பேரு கூட்டணி. அதுல ஒண்ணு முசுடு எரும. அது பாதி நேரம் எங்கட்ட சண்ட போட்டு பேசாது. ஆனா பஸ்ட் ரேங்க் எடுக்கும். ஹேண்ட் ரைட்டிங் வேற அழகாருக்கும். அதனாலயே சண்ட போட்டாலும் இவன் நம்ம ப்ரெண்டுடானு மானசீக நட்பாருந்தோம். இது ஒரு பக்கம் இருக்கட்டும்.
அந்த நாயி திடீர்னு ஒருநாள் போன் பண்ணுச்சு. என்ன மச்சி திடீர்னு போன் பண்றன்னு கேட்டேன். கவனிக்க. அப்போதுவரை அவனை நாயி என அழைக்காமல் மச்சி என மனித மாண்புடன் தான் அழைத்து வந்தேன். அந்த மச்சிநாயானது, மச்சி ஜெய்லர் படம் பாத்தியா என்றது.
நமது நெல்சன் விரும்புதலை கருத்தில் கொண்டு அப்படி கேட்கிறதோ அந்த நாயி என நினைத்து, பாத்தேன், சுமார்தான் என்றேன்.
தனக்கு அந்தப்படம் பார்க்கையில் என் நினைவு வந்ததாக அந்த நாயானது குரைத்தது (தெரிவித்தது என்பதற்கு பதில் நேட்டிவிட்டிக்காக குரைத்தது என்று எழுதியிருக்கிறேன். அது குரைக்கவெல்லாம் இல்லை, உரைத்தது என்று வைத்துக்கொள்க).
அந்தப்படத்தில் நாமறிந்து நம் சம்மந்தமாக எதுவும் இல்லையே, இந்த நாய் எதைக்கவ்விக்கொண்டு வந்து இங்கு வாந்தியெடுக்கிறது எனத்தெரியவில்லையே எனக்குழம்பி, சொல்றத முழுசா சொல்லு நாயே (அதாவது மச்சி, அப்போது மச்சி, இப்போது அது நாய்) என்றேன்.
அந்த ப்லாஸ்ட் மோகன் கத மச்சி என்றான். என்றான் என்ன என்றான், என்றது. அதுல என்னடா என் கத இருக்கு எனக்கேட்டேன். ஒனக்கு அந்த மேட்டர் தெரியாதில்ல என கொசுவர்த்தி சுற்றத்துவங்கியது.
இந்த நேரத்தில் ஒரு குறுங்கதையைக் குறிப்பிட வேண்டும். பள்ளிப் பருவத்திலே நமக்கு முழு போகஸ்டாக ஒரு இட்லிக்கண்ணியின் மீது இடையறாத பரிசுத்த ப்ரேமம் இருந்தது. [அந்த தேவதையின் தற்போதைய இருப்பைக் கண்டுபிடிக்கும் புனிதமான உயரிய நன்னோக்கில்தான் நண்பர்கள் அடங்கிய ட்சப் குரூப்பே துவக்கப்பட்டது. அதைத் துவக்கியதும் அந்த நாய்தான் என்று வையுங்கள். நாயி நல்லதும் பண்ணும் அது பேர்ல கெட்டதும் பண்ணும். பொறம்போக்கு நாயி.] இந்தப் ப்ரேமம் மிக ரகசிய ப்ரேமம். யாரிடத்தும் வெளியே சொல்லாதது. ஏன் என்றால் அப்போது நான் எந்த ஓமொர்க்கும் எழுத மாட்டேன். ஆங்கிலம் தமிழ் தவிர்த்து மீதி எல்லா நேரமும் வகுப்புக்கு வெளியே. ஒன்று நீல் டௌன், அல்லது வால் சேர் போட்டுக்கொண்டு. கணக்கு சுதி சுத்தம். ஹிஸ்டரி, ஜிகே, இந்தி, சிவிக்ஸ், பயாலஜி, பாட்டனி, பிசிக்ஸ் முதலிய பாடங்களாச்சும் சோம்பலின் காரணமாகத்தான் ஓமொர்க் எழுதுவதில்லை. கணக்கு என்னவென்றே புரியாததால் தொடுவதில்லை. சோசியல் ஸ்டடீஸ் வாத்தி ஒருவர் இருந்தார். அணிலுக்கு முதுகில் ராமன் வரைந்த கோடுபோல் என் முதுகில் பார்த்தால் அந்தாளின் கைரேகை பதிந்திருக்கும். அந்த மாதிரி ஒரு நாயடி பேயடி அடிப்பார் அந்தத் தாயோளி.
டீவியேட் ஆகிறது. முட்டக்கண்ணியின் மேல் ஒரு கண் இருந்தாலும் வெளியே சொல்லத் தயக்கம். ஓமொர்க் எழுதாத, தமிழாங்கிலம் தவிர எல்லா பாடத்தின் மார்க்கிலும் லிப்ஸ்டிக் பூசப்பட்ட ரிபோர்ட் கார்ட் நமது. கருப்பு என கிண்டலடிக்கப்பட்டவன் வேறு. அப்போது எல்லோரும் ஒரே ஹைட் என்பதனால் குள்ளக்கூதி எனும் சிறப்புப் பட்டம் அப்போது வரவில்லை. அது பிற்கால சேர்க்கை. இப்படி நாம் படிக்காத தற்குறியாக இருக்கிறோமே நம்மை எப்படி இந்தப் பெண் காதலிப்பாள் எனும் செல்ஃப் டௌட் எனப்படும் சுய சந்தேகம் ஒரு புறம். அந்த முட்டக்கண்ணிக்கு நம் குழுமத்தில் நன்றாகப் படிக்குமே ஒரு முசுடு. அவன் மீது கண். இவனுக்கும் அவள் மீது ஒரு கண் என்பது எனக்குத் தெரியும். ஆனால் தனது கெத்தை மெய்ண்டன் செய்வதற்காக வெளிச் சொல்லாமல் இருந்தான். குணா படம் பார்த்த பாதிப்பில் நாமளும் முட்டக்கண்ணியைத் தூக்கிக்கொண்டு போய் மலைக்காட்டில் வைத்து வாழ்ந்து விட்டாலென்ன? நம் நண்பர்கள் வேளா வேளைக்கு சாப்பாடு கொண்டு வந்து கொடுத்து விடுவார்கள், பிறகென்ன கவலை என்றெல்லாம் நினைத்ததுண்டு. செலவுக்கு வீட்டில் காசு வாங்கிக் கொள்ளலாம் என்ற தைரியம் வேறு. [ரியாலிட்டியில் நட்ராஜ் ஜாமிண்டிரி பாக்சுக்காக விண்ணப்பம் போட்டு அது மூன்று வாரங்களாக காத்திருந்தது]
அவ்வாண்டு முழாண்டுக்கு அப்புறம் அக்கிரஷானது திடீரென காணாமல் போனது. எங்கு போனது என்ன ஆனது எனும் தகவல் இதோ, இந்த ‘இதோ இந்த’ என்று டைப்பும் வரையில் தெரியவில்லை. மீண்டும் பள்ளிக்குச் சென்ற சில மாதங்களில் மலேனா படத்தில் வரும் (மோனிகா பெலுச்சி வருகை தரும்) சம்பவம் போல் ஒரு சம்பவம் நடந்தது. ஒரு புது வருகை. மொத்தப் பள்ளியையும் மிரள வைத்த பதுமை.
கட் செய்தால் எப்படியோ அந்தப் பெண்ணும் நாங்களும் ப்ரெண்ட்ஸ் ஆகிவிட்டோம். நாங்கள் என்றால் நானும் அந்த நாயும் அந்தப் பெண்ணும். முசுடு அப்போது முற்றாக எங்கள் நட்பை கழட்டி விட்டான். ஒரு வேளை க்ரஷ் பள்ளியை விட்டுச் சென்ற டிப்ரஷன் போல. முந்திபோல அவன் பேசாவிட்டாலும் நாங்கள் சென்று அவனிடம் பேசுவதையும் நிறுத்தி விட்டோம். பாய்ஸில் இருந்து மேனாக மாறிக்கொண்டு வருவதை நன்றாகவே உணர்ந்த பருவமது.
எல்லாத்தையும் மறந்து விடுங்கள். அந்தப் புதிய நட்பான கிரஷ் நமக்கு சூனியர் என்றாலும் நானும் நாயும் அவளின் தோள்பட்டைக்குத் தான் இருந்தோம். ஏதோ ஒன்று எங்கள் மூவருக்குள்ளும் ஒரு வைப் செட்டானது. விதி வலியது. இவளும் பள்ளியை விட்டு ஒரே வருடத்திலேயே கிளம்புவதாய்ச் சொன்னாள். என்ன இது ஆர்ட் ப்ரேக், மீண்டும் மீண்டும்மா என நினைத்துக் கொண்டு, சரி அவளுக்கு ஒரு கிப்ட் [அப்போதெல்லாம் கிப்டளிக்கும் ரொமாண்டிக் பர்சனாக இருந்துருக்கிறேன். க்காளி அப்பன் சம்பாரிச்ச காசு. இப்போது நாம் சூ கிழிய சம்பாதிக்க ஆரமித்ததும் குண்டுமணி கூட கொடுப்பதில்லை எவளுக்கும்] கொடுக்கலாம் எனக் கருதி சிறந்த முறையில் யோசித்து அவளுக்கு ஒரு இங்லிஷ் டிக்சனரி வாங்கினேன். [பாருங்கள் காஜியாயிருந்தாலும் கல்வியின் கண்ணாக இருந்திருக்குறேன். பாராட்டப்பட வேண்டிய, ஆனால் மற்றவர்கள் பாராமுகமாய் இருக்கும் விசயம்]. டிக்சனரி வாங்கினேனா. அத்தோடு கட் செய்யுங்கள்.
இந்த நாயி போன் பேசியதே. அப்போது ஒன்று சொன்னது. வெறும் டிக்சனரியை எப்படி தருவது எனக் கருதி, அதை கிப்ட் வ்ராப் செய்ய ஜிகினா பேப்பரும் வாங்கினேன். ஆனால் அதை எப்படி கிப்ட் வ்ராப் செய்வது எனத் தெரியாததால், இந்த நாயிடம் கொடுத்து, கிப்ட் வ்ராப் செய்து அதை அந்த கிரஷிடம் கொடுத்து விடும்படி கூற… கூறினேனா? இந்த நாயி அந்த டிக்சனரிக்குள்ள எ லவ்விங் கிப்ட் பை என அந்த நாயின் பெயரை எழுதி அதை கிப்ட் வ்ரேப் செய்து கொடுத்திருக்கிறது. இந்த உண்மையை அந்த நாயி 25 வருசங்கழிச்சு இப்போது சொல்குகிறது.
அந்த ப்லாஸ்ட் மோகன் கிப்ட்டெல்லாம் வாங்கி தன்னோட கிப்டுன்னு அந்த டோப்பா மண்ட குடுப்பான்ல மச்சி, எனக்கு அத பாக்கறப்பலாம் நம்ம மேட்டர்தான் ஞாபகம் வந்துச்சி. அதான் கால் பண்ணி சொன்னேன் என்றது.
என்னடா கிப்டுக்குப் பின் ஒரு சத்தமும் இல்லையே அந்த கிரஷிடமிருந்து என இத்தனை வருடங்களாக ஏங்கித்தவித்தது இப்போது விளங்கியது.
இந்த நாய் நாய் நாய் நாயை, என்ன செய்யலாம் சொல்லுங்கள்?
Comments
Post a Comment
Pass a comment here...